每當提起日軍响二戰進攻香港嘅歷史，除咗香港保衛戰外，其實東江縱隊嘅活動亦好值得後世人去認識，其中响香港淪陷時秘密營救中國知名文化人嘅行動，更係為人津津樂道。

香港响1941年12月25日淪陷後，當時一批國內文化界人士包括何香凝、柳亞子、鄒韜奮、梁漱溟、茅盾、燕楚生等滯留咗响香港，而日軍當時亦好想搵佢哋出嚟，仲公開宣傳話要搵佢哋合作唱好大東亞共榮圈，而當時東江縱隊成員就設法搵呢批文藝界精英。

據了解，早响香港淪陷前，拯救文化人嘅計劃已經展開，當香港淪陷後，東江縱隊兩支小隊分東西兩條路線進入香港，開闢咗兩條通道，東面就由西貢經飛鵝山再到牛池灣，西面就由元朗經大帽山到荃灣。除咗兩條陸路路線，當時仲有一條水路通道，由上環到長洲經澳門再進入國民黨統治區。

不過，面對日軍封鎖香港對外嘅陸路同水路，東江縱隊成員就算搵到佢哋之後，要諗辦法帶佢哋離開香港都係一件難事。據當時東江縱隊港九大隊成員憶述，佢哋當時用嘅方法就係將呢批文化界人士打份成「難民」咁樣，混入被遺返嘅難民隊伍當中，就咁離開咗香港。

據內地官方資料所載，香港淪陷期間所進行嘅秘密大營救，救咗800幾位「愛國民主人士、文化界知名人士以及國際友人」。

原圖：網絡