唐代嘅考古遺址阿史之前都同大家介紹唔少，近排社科院嘅考古研究所就公佈咗喺舊年4月到8月嘅科學發掘，當中就發現到隋仁壽宮同埋唐九成宮4號殿址可能就係唐高宗同埋武則天曾經嘅避暑寢殿。

據考古隊介紹，呢個位於陝西麟遊縣嘅遺址，其實係隋唐兩代宮殿嘅基址，隋文帝楊堅、隋煬帝楊廣、唐太宗李世民、唐高宗李治同埋武則天等等都多次嚟到呢個地方，所以呢度亦都有《九成宮醴泉銘碑》《萬年宮銘碑》等重要嘅文物。

隋仁壽宮唐九成宮始建於隋開皇十三年（公元593年），一開頭係叫做「仁壽宮」，後來就改名「九成宮」。據歷史記載，去到唐文宗開成元年（公元836年），呢個地方就因為受到暴雨同埋洪水侵襲，大部分宮殿都被沖毀。而舊年開始，考古隊就對呢度展開發掘，實際就清理出2300平方米遺址，當中就搵到石香爐、銀簪子、玻璃質殘渣、鎏金乳釘、錢幣等等500幾年文物。

剛才阿史都提到，呢個遺址其實係隋唐兩代宮殿嘅基址，今次發掘入面亦都好清晰可以分辨到呢點，隋代嘅基台主要係由散水、基台台壁同埋內裏夯土組成；而唐代嘅官殿就係喺呢個石構殿基上面加建，所以考古隊就推斷呢個地方正正就係唐高宗武則天避暑嘅寢殿。

原圖嚟自網絡