洛陽東漢陵園遺址出土 確認墓主為漢桓帝劉志

以往阿史都同大家講唔少唔同年代嘅墓葬，當中帝皇嘅墓穴就更加罕見，究竟呢啲帝王死後下葬嘅情況會係點？相信唔少史友都會有呢個疑問，而近日內地洛陽東漢陵園遺址，就正式確認係一個帝王嘅墓葬。

呢個位處洛陽白草坡東漢陵園遺址，其實早喺2003年就己經開始由洛陽市文物考古研究院進行大規模嘅考古發掘，早年其實已經確認呢個陵園唔簡單，但就一直都未肯定到墓主係邊個。咁考古隊今次又係點樣落到結論呢？原來今日考古隊喺遺址發掘到帶有「光和三年造」（光和三年即公元180年）題記嘅圓形石製器物，據考證之後就肯定呢個係漢靈帝為漢桓帝修建陵園時製造，換言之其實出土文物所屬嘅墓葬就係漢桓帝劉志嘅宣陵。

由於呢次嘅發掘係有紀年嘅器物，相當有助考古團隊全面了解東漢帝陵佈局、形制，亦都可以通過呢次發現，逐漸了解到成個東漢帝陵陵園圖景。