河南出土隋代漢白玉石棺床墓

近排內地嘅考古學界又有一樣重大嘅發現，就係喺河南安陽市龍安區一個建設工地入面，發現到一座比較有規模嘅墓葬，經過考證之後發現呢個布局嚴謹嘅墓葬應該係隋代漢白玉石棺床墓。

喺呢個床墓入面有住唔少重要嘅發現，據考古人員介紹，呢個墓應該係隋開皇10年（公元590年）麴慶夫妻合葬墓，墓入面嘅石棺床各部分都分別有瑞獸、神像、聖火壇等圖案，部分仲有貼金同埋彩繪；而喺圍屏嘅圖案就刻有墓主日常生活場景、宗教典故等等。

咁可能有史友會問，呢個墓即係有咩發現？講到呢點就真係大發現喇！事關呢個床墓入面嘅圖案有住濃厚嘅祆教風格同埋早期佛教風格，呢次發現亦都印證咗一點，就係鄴城、安陽地區喺公元3世紀到6世紀都係重要嘅政治、文化同埋軍事中心,甚至仲係絲綢之路喺東方嘅起點之一。