太平洋戰爭 美軍採用「跳島戰術」收復島嶼？

早幾日就同史友們介紹到太平洋戰爭入面嘅中途島戰役以及瓜達康納爾島海戰，呢兩場咁重要嘅戰役之後，成個太平洋嘅戰役即時轉變，日軍基本上已經失去咗制空權並且逐步撤退。而喺太平洋戰爭入面，美軍之所以可以戰勝到日軍，其中一個因素就係歸功於「跳島戰術」。

所謂嘅「跳島戰術」由美國海軍上將威廉·海爾賽同埋佢參謀長布朗寧諗出嚟，就係唔採用逐一收復島嶼嘅做法，反而係收復完一個島嶼之後，跳過鄰近嘅島嶼，走去攻打下下一個島嶼。咁樣嘅做法雖然係用多咗資源同時間，但就可以跳過一啲日軍防守頑強嘅地方，當鄰近嘅島嶼都收復晒嘅時候，仲可以用海空封鎖嘅方式孤立日軍佔領嘅島嶼。

喺太平洋戰爭入面，盟軍其實係喺1943年拎到海空支配權之後先實行呢個戰術，先後攻陷特羅布里恩德群島、新喬治亞群島拉維拉島、瓜加林島等等，令到日軍嘅群島防禦體系崩潰，突破太平洋內防禦圈，直指日本本土。雖然「跳島戰術」好似好有效，但其實係有住唔少限制，亦都需要用到好多手段隱蔽「跳島」企圖，所以唔係咁易可以複製到。