「荊軻刺秦王」嘅故事大家應該由細聽到大，但呢個故事又係發生喺邊度，大概嘅場景又係點呢？近排內地嘅考古人員就喺位於陝西省關中平原腹地秦咸陽城遺址有啲新發現。

據陝西省考古研究院公佈，經過多年嘅發掘，基本上已經了解晒成個秦咸陽城遺址北區嘅布局。成個宮署區現存面積達到500萬平方米，由壕溝、台塬構成防衛系統。唔單止咁，呢個宮殿分區相當明確，就好似西部、北部就係官署手工業製作、管理及府庫區，當中仲有高等級骨器製作、金屬冶鑄、鑄幣、石甲胄製作等手工業遺存；而東部發現嘅高台就係政務大殿嘅位置。

今次考古人員就喺呢個西安市主城區以北18公里嘅遺址搵到一個高台建築遺址，相信呢個就係當時宮殿宮處區。經計算之後，就發現原來呢個建築嘅面積係達到一千平方米，極有可能係秦國當時嘅政務大殿，亦即係「荊軻刺秦王」發生嘅地方。據記載，「荊軻刺秦王」發生喺公元前227年，荊軻受燕太子丹指派帶同燕督亢地圖以及將軍樊於期首級，去到秦國刺殺秦王嬴政。結果遵憬秦王喺咸陽宮隆重接見荊軻，荊軻刺殺秦王不果，反而事敗被殺。

原圖嚟自網絡