呢排阿史就同大家介紹太平洋戰爭期間，日本就喺幾場重要嘅戰役入面慘敗，捐失幾架航空母艦之下，失去咗喺太平洋嘅制空權。喺咁樣嘅劣勢之下，日軍就用到一招相當殘忍嘅招數，就係「神風戰術」。

所謂嘅「神風戰術」，亦都係喺二戰末期日軍為對抗美軍強大嘅優勢而採用，務求以武士道精神，要求年輕嘅戰士按照「一人、一機、一彈換一艦」嘅原則，對美國海軍艦艇編隊、登陸部隊進行自殺式攻擊。喺二戰嘅後期，由於日軍喺兵力、武器裝備、補給物資等方面都相當缺乏，於是令到呢種戰術相當廣泛，但原來「神風戰術」喺戰爭比較早嘅時候就已經出現。

「神風戰術」據講最早就喺日俄戰爭就已經出現過，但當時就冇乜組織同規模，所以仲未構成係一種戰術。而最早有呢個意識嘅戰役就數到1944年雷伊泰灣海戰。當時美軍打算喺雷伊泰灣登陸菲律賓，切斷日本從南洋輸送嘅燃料同物資。得知呢個消息，日軍就決心一定要打擊盟軍。當時駐菲日軍第一航空隊受命支援海軍時，但得40架飛機根本難以完成任務。

於是，「神風特攻之父」大西瀧治郎中將就提出將軍機裝上炸藥撞擊美軍航母，咁就可以令到對方癱瘓幾週，而第一批嘅隊員，就係佢喺軍事學校招募，年齡大約就只係得17歲。1944年10月21日，由24人組成嘅特攻隊成功擊沉兩艘美國航空母艦，「神風特攻隊」一舉成名。

原圖嚟自網絡