新蒲崗有邊「八街」？

如果有史友們喺新蒲崗果頭返開工，唔多唔少都會知道啲呢個地方嘅歷史，例如呢個區域原本有條始於南宋嘅蒲崗村，喺二戰嘅時候就因為日軍擴建啟德機場而夷平咗附近二十幾條村落，其中一條就係蒲崗村。而提到比較熟悉嘅一件事，當然就係新蒲崗有「八街」啦！

如果大家細心留意，應該都會發現到其實新蒲崗嘅街名係好特別，就好似大有、雙喜、三祝、四美等等。呢啲街名並唔係一個巧合，反而係應用咗香港歷史上第一個比較有系統嘅街道命名系統，其餘四條街分別就係五芳、六合、七寶、八達。

雖然現時頭兩條街係叫做「大有」、「雙喜」，但其實以前呢八條街分別係叫做第一街至到第八街，只係後來唔想同西營盤第一、二、三街混淆，先至會將頭兩條街改做「大有」、「雙喜」，而其餘街道照樣用返數目字，但就加上一啲傳統吉祥字眼組合，新蒲崗「八街」就係咁樣嚟！