如果依家同史友們提起「雀仔街」，相信大家腦海入面都會即時諗到重建搬遷之後嘅園圃街雀鳥花園，如果有返咁上下年紀嘅史友，可能仲會諗起以前康樂街果邊嘅「雀仔街」。咁唔知史友們又知唔知，其實香港第一代嘅「雀仔街」應該係位於港島果邊呢？

阿史想介紹嘅正正就係閣麟街，呢條位於中環半山區，連接皇后大道、擺花街同埋結志街嘅街道，其中一部分正正就喺中環至半山自動扶梯系統當中。雖然大家今時今日路過都仲可以見到唔少古老嘅唐樓，但以前呢條街古舊嘅事物真係唔止咁少。

喺19世紀末，閣麟街一時之間就開設咗幾多間雀鳥店，最初就只係賣下鳥糧蟲蜢，後來就發展成專門售賣雀鳥，同埋其他相關用品。雖然呢條係叫做「雀仔街」，但其實同一條街上仲有唔少食肆、藥行同埋酒莊，茶樓嘅出現更加令到呢種賞鳥文化成為熱潮，呢條第一代嘅「雀仔街」一直興盛到1930年代。

咁點解後來「雀仔街」又會冇啦啦消失呢？咁呢度就有兩個講法，第一個講法就係話因為二戰期間，閣麟街受到日軍飛機轟炸，唔少建築物都被破壞，去到戰後呢條街就已經冇雀鳥店。而另一個講法就係話，因為呢條街兩邊都有唔少雀仔鋪，經常都被人投訴污糟阻礙交通，慢慢就搬晒去得雲茶樓附近，所以「雀仔街」就咁消失。

原圖嚟自網絡