神醫華陀可能係印度人？

早兩日就同史友們介紹到哪吒可能係由印度神話人物演化過嚟，咁就有唔少史友都留言話，仲有好多歷史人物都可能係印度人嚟，其中一位就係神醫華陀，咁今次阿史就同大家介紹下啦！

據《後漢書》、《三國志》兩書記載，華佗年近六十，但亦保持壯容。呢位東漢末年方士、醫師一生行醫濟世，精通內科、外科、婦科等，仲有唔少經典嘅行醫故事，所以佢後來亦都被稱為中國古代四大名醫，咁佢到底有冇可能係印度人呢？

關於華陀嘅真實身份，其實一早已經有學者提出質疑，而呢位正係中國清華大學教授陳寅恪。陳寅恪早年就提出過幾點質疑，認為華陀可能係印度人。首先，喺中國古代甚少有人以「華」為姓，而「陀」字亦都只喺印度比較常見；而且，雖然《三國志》係正史，但陳寅恪就提出陳壽經常將啲冇考證嘅故事寫入自己嘅文獻，所以對華陀嘅記載有可能係虛構。最後一點就係，《三國志》入面有講到華陀用麻沸散醫病，之但係麻沸散原料曼陀羅花係喺天竺先至有，華陀到底又係點樣得到呢？