閻羅王原來唔止得一個？

呢兩日阿史就同大家介紹咗牛頭馬面、黑白無常，咁順理成章當然係要介紹埋地府嘅大佬「閻羅王」啦！喺唔少影視作品入面，提到「閻羅王」好多時間都只係呈現到其中一個出嚟，但原來喺佛教嘅記載入面閻羅王一共係有十個？阿史今次就同大家介紹下啦！

「閻羅王」呢個宗教信仰實際上係起源自印度教神祇閻魔羅闍，被視為係地獄嘅主宰。華人尊稱「閻羅王」為「閻魔羅闍大王」，喺佛教嘅角度，人死後去到地獄就會因為自身嘅惡業而受苦，「閻羅王」就係負責判決、教誡呢啲落到地獄嘅眾生，並且命令鬼卒加以懲罰。

當「閻羅王」嘅信仰傳到嚟中國之後，同中國本土嘅道教信仰互相影響，慢慢就演變出具有漢化色彩嘅「十殿閻羅王」傳說。凡係人死後，閻羅王就會派遣下屬黑白無常或者牛頭馬面，將人嘅魂魄押解到陰曹地府接受審判，而呢場審判會喺十殿進行，呢「十殿閻羅王」依次分別係秦廣王、楚江王、宋帝王、五官王、閻羅天子、卞城王、泰山王、都市王、平等王同埋轉輪王，每位閻羅王都有相應嘅懲處。