喺古代嘅皇室，要做一次皇帝已經好唔容易，但喺明朝嘅時候，就有一個人分別做咗兩次皇帝，而佢嘅經歷亦都有唔少故事可以講，今次阿史就同大家介紹明英宗朱祁鎮啦！

明英宗朱祁鎮係明宣宗朱瞻基長子，佢出生喺宣德二年（1427年），關於佢嘅生母就有唔同嘅講法，有指佢係孝恭章皇后嘅仔，亦有指佢係孝恭章皇后暗中取宮女之子為己子。咁朱祁鎮作為長子，又係皇后個仔，順理成章亦都喺宣德十年以7歲之齡即位，當年係由太皇太后張氏輔政、內閣由三楊（楊士奇、楊榮和楊溥）主持，成個明朝嘅社會發展先得以維持。

之但係，當太皇太后張氏駕崩，朱祁鎮就專寵宦官，後來瓦剌大舉南侵，佢就御駕親征參與土木堡之戰，仲兵敗被俘虜，皇位就變咗由佢細佬朱祁鈺即位。去到後來北京保衛戰勝利之後，瓦剌倡議和談仲想歸還英宗，當時景泰帝唔想呢件事發生，結果就喺英宗回朝後將佢軟禁喺南內崇質宮。

去到景泰八年正月，景泰帝病重，當時手握重兵嘅武清侯石亨、副都御史徐有貞等人聯合太監曹吉祥就帶兵攻入南宮，發動咗呢次「奪門之變」，幫朱祁鎮重奪皇位。就係咁，明英宗朱祁鎮就做咗明朝第六位同埋第八位皇帝喇！

原圖嚟自網絡