加多利山兩條路 分別紀念兩個家族？

如果講到九龍區傳統豪宅區，相信大家腦海中都必定會浮現出加多利山呢個名，呢個位於九龍城區嘅山丘古稱大石鼓，喺呢座山上面就曾經有唔少名人居住，咁阿史就唔多講，反而就想同大家介紹山上兩條路！

加多利山喺1930年代先開始發展，喺1937年嘅時候山上就只係得10幢建築，去到二戰之後50年代，山上就已經有57座建築；時間去到1984年，總數仲去到124座，難怪係號稱香港四大豪宅區之一。

喺呢座山上面，主要就有兩條主路，分別係紀念兩個家族，第一條就係嘉道理道，係專門紀念喺香港建立多所學校、發展唔同領域、熱心公益嘅嘉道理家族，喺呢條路上就多數都係獨立洋房；而呢一條就係布力架街，就係用嚟紀念同嘉道理家族頗有淵源嘅土生葡人 J. P. Braga，佢就喺上世紀九龍區發展作出過唔少貢獻，呢個區域就係以3層高嘅分層戶為主。