唔知史友們有冇睇到星期四晚嘅央視春晚，如果大家有睇嘅話，應該都會留意到其中一幕就係圖入面呢尊天龍山石窟佛首登場嘅畫面，呢次亦都係呢尊佛首失落接近百年之後重新回歸中國、第一次向公眾露相嘅日子，阿史今次就同大家介紹下啦！

呢尊佛首據專家估計原本係位於山西太原天龍山石窟，開鑿嘅年份大概就係喺北朝晚期至隋唐時期，成尊佛首長33.7厘米，寬30.4厘米，高44.5厘米，重量達到55.5公斤，而且保存得相當完整，表面仲有彩繪痕跡，面相亦都相當慈祥。咁到底點解一尊佛首會令到大家都咁隆重其事呢？咁就要由天龍山石窟講起！

天龍山石窟喺隋唐興盛，但去到宋元就開始衰落，甚至有一段時間都冇人發現到。直到20世紀初，呢個石窟就被重新發現，喺20年代仲引嚟唔少日本古董商人注意，引發大規模盜鑿，呢個時候至少有240尊佛像被盜。

而呢次呢尊佛首就係喺2020年9月14日一次東京拍賣會入面發現到，國家文物局最後同拍賣行以及賣家溝通後，日籍文物持有人就決定將佛首捐獻畀中國政府，呢次亦都係近百年嚟第一件由日本歸國嘅天龍山石窟流失佛雕。未來嘅日子，呢尊佛首會喺北京魯迅博物館「咸同斯福——天龍山石窟國寶回歸暨數字復原特展」中展覽展示。

原圖嚟自網絡