田單發明火牛陣 猛衝燕軍連克七十餘城？

今年係牛年，阿史循例都想同大家介紹下一啲歷史上嘅「名牛」應一應節，而今次阿史想介紹嘅並唔係食得嘅牛，而係歷史上相當著名嘅「火牛陣」。

提起「火牛陣」，相信史友們應該都聽過呢個陣法係由戰國時期齊國嘅將軍田單發明，《戰國策·齊策》入面就講到喺燕昭王時期，燕將樂毅就帶軍攻打齊國，齊國將軍田單就堅守住山東平度，即係古稱「即墨」嘅地方。去到公元前279年燕惠王即位之後，田單就成功用反間計令到新任嘅燕王換走本身就睇唔順眼嘅樂毅，轉由騎劫呢位將軍攻打齊國即墨。

之但係，原來騎劫庸碌無能、濫殺降卒，甚至仲喺齊國掘墳墓焚屍，呢個舉動就激發咗齊國人怒火。《史記.田單列傳》入面就指出，雖然齊國人對佢恨之入骨，但當時田單就忍辱嚟招詐降，繼而就喺短時間之內齊集接近一千隻牛，牛角上面就縛上兵刃，牛尾就縛葦灌油再點火。結果就係成千隻帶有武裝嘅牛向燕軍衝去，緊隨其後就係5,000個齊國士兵，呢個陣法大敗燕軍仲殺埋騎劫。憑住呢個勢頭，田單就乘勝連克七十餘城，呢個相傳就係「火牛陣」嘅起源！