「愚公移山」嘅故事相信唔少史友都聽過，但如果聽到現代人走去掘秘道，唔知史友們又有咩諗法呢？近日就有媒體報道，一位內地老翁自行掘地，期間仲發現宋朝秘道添！

呢位老翁住喺河南洛陽，一直都生活喺當地嘅鄉郊大河陽村嘅自家窯洞，而關於呢個窯洞，原來一直都有一個秘密，就係有一個被封住嘅地洞入口，入面到底有啲咩，多年嚟都冇人知。而去到兩年前，呢位老人家終於抵受唔住好奇心，決定一手一腳挖開呢個地道。當佢挖開地道之後，就發現原來呢條路係可以通往村入面每家每戶，認真神奇。

呢個消息傳出之後，就有考古學家去到當地考察，發現呢條地道長達100米，接近有千年歷史，估計就係宋金時期興建，用嚟秘密運兵及儲存糧食，呢次發現就令到大家可以窺探到千年前嘅建築技術到底有幾犀利！

原圖嚟自網絡