早幾個月阿史就同大家介紹過龐貝古城嘅考古團隊有新發現，當時搵到一間龐貝古城嘅小食店，間接就通過呢個遺址了解到當時嘅人鍾意食咩食物。而呢個二千幾年前因為火山爆發而被掩埋嘅古城，原來仲有唔少野值得同大家介紹。

喺龐貝古城入面其實就有一個叫做Casa dei Ceii嘅花園，入面本身就有住一幅二千幾年前嘅壁畫，只係因為被泥土掩埋而冇畀人發現。直到1913-1914年，當時有人對呢個位置進行發掘，意外搵到呢幅壁畫。但早年發現嘅時候就因為年代太過久遠，基本上都睇唔出原畫係點樣，只係睇到有幾隻動物。經過專家修復，為壁畫重新塗上顏料，就發現原來係一幅相當令人驚嘆嘅狩獵作品！

專家就表示，呢幅壁畫估計就係公元前20至10年左右完成，係當時龐貝流行嘅壁畫風格，壁畫入面就可以見到有野豬、豹及獅子等猛獸，壁畫下方就有羊及牛群同埋大型犬隻，全部動物嘅姿態都相當活躍，同場亦都有手持狩獵工具嘅獵人同埋觀賞狩獵嘅貴族，成個畫面就還原返去二千年前古人狩獵嘅情況，係相當珍貴嘅畫作！

原圖嚟自網絡