鍾意軍事史又或者古蹟嘅史友，相信都會認識摩星嶺、城門陵堡呢類嘅戰時槍堡，但如果同大家講，其實鹿頸都有一個槍堡群，而且仲係全港現存最完整嘅二戰槍堡群，大家又聽過未呢？

話就香港大學嘅研究團隊就用咗接近十年嘅時間去研究位於鹿頸嘅呢個槍堡群，負責呢個研究嘅黎偉聰教授就公布，現時鹿頸山頭上就有14個槍堡，其中就有7個面積比較大，附近仲會有戰壕連接槍堡，仲估計最大果個槍堡應該就係成個建築群嘅指揮部。而成個槍堡群嘅設計嚟講，細嘅7個其實就只係可以畀1個人進行，而大嘅槍堡就可以容納到7個人，所以7個嘅「衛星槍堡」其實係為咗覆蓋大槍堡嘅「死角」，呢個設計都相當有意思。

嚟到大家比較關心嘅一個問題，到底呢個槍堡係由咩人去興建呢？黎教授就表示好有可能係當時新界嘅日軍為抵禦抗日勢力，即係抗日游擊隊東江縱隊而建。雖然以往就有學者提到呢個槍堡群有可能係日軍為阻止盟軍而建，但呢次研究就指出，由於南涌、烏蛟騰都係當時游擊隊大隊部嘅據點，而最大槍堡係指向南涌，雙方亦都發生過激戰。再加上歷史學家高添強著作入面亦都有提到，鹿頸一帶嘅村民憶述日佔期間，有村民被逼幫日軍建設槍堡群、觀察站，所以就更加印證到呢個講法。

鹿頸槍堡群現時就只係二級歷史建築，並冇得到充足嘅保育工作，但如果呢次研究屬實，就真係有相當重要嘅歷史價值，絕對值得保育啊！

原圖嚟自網絡