李鴻章雜碎係咩味道？

早幾日阿史就同大家介紹到一味由台灣「湘菜廚神」所創嘅「左宗棠雞」，而講講下就有史友提到另一款都係以晚清四大名臣命名嘅菜式，阿史就當然要同大家介紹下啦，呢味菜式就係「李鴻章雜碎」喇！

同「左宗棠雞」有啲唔同，呢味「李鴻章雜碎」係直接喺美國當地發明同埋流行，唔少華人都未必食過啊！「李鴻章雜碎」（Chop Suey），嚴格嚟講就係一種美式嘅中菜，將豬肉絲或者雞絲加埋綠豆芽、芹菜絲、筍絲等材料炒埋一碟，味道係點就真係要喺當地試過先知喇！言歸正傳，到底呢味菜式係點嚟，又點解會同李鴻章有關係呢？相關嘅起源就有幾個，但最主流嘅講法自然就係阿史要介紹嘅呢個故事。

相傳喺1896年李鴻章訪問美國果陣，因為食唔慣西餐就只好帶埋私人隨身廚師。只係，當地嘅食材唔係咁易搵到，經常都係剩菜雜燴成一鍋。而有一日，就有外國嘅客人聞到到飯香過到去李鴻章嘅住所食飯，食嘅亦都係剩菜雜燴，食完之後個個都話好味，仲想問菜名。結果李鴻章隨口就答咗一句「雜碎」，發音就同「Hotch-potch」相近，結果呢個名隨即就畀門外嘅記者聽到，「李鴻章雜碎」就咁喺當地出名。