秀茂坪邨集齊所有世代嘅和諧式大廈？

繼續同史友們介紹香港嘅一啲特色公共屋邨，早排就同大家講到秀茂坪嘅地名起源，咁今次就當然要講秀茂坪邨啦，事關呢條屋邨有住全港兩個「唯一」，就等阿史同大家介紹下啦！

先講其中一個「唯一」，就係秀茂坪邨係全港唯一一條集齊所有世代和諧式大廈嘅公共屋邨，呢一點係相當罕有嘅情況，到底點解唔同年代秀茂坪邨都會有新建築呢？喺秀茂坪邨未建成之前其實就係秀茂坪新區，亦即係秀茂坪徙置區，最初就有成44座徙置大廈，喺1964年至1971年間陸續建成入伙，其中一部分用作安置黃大仙昇平村、成安村、教民村、馬山村嘅居民。

要知道原先45座徙置大廈其實都係分批建成，分別係先興建第1至17座、第19至41座以及第42至45座。而踏入90年代，原有44座舊式公屋陸續清拆重建，就只保留原本嘅第45座變成現時嘅第1座秀明樓。至於其餘嘅17座，就分別喺1993年、1995年、2001年以及2019年分批應用唔同設計落成，令到呢條公共屋邨集齊到和諧一、二及三型嘅大廈。