尋日就同史友們提到孫中山先生逝世之前留低嘅七字遺言，直到臨終前嘅一刻佢都依然係心牽中國。而喺治喪過程之中，原來孫中山一共用過四副棺材，到底當中有咩原因呢？

先講第一副，喺孫中山過身之後第三日，佢嘅遺體就被移送到北平協和醫院進行防腐處理，然後就放入第一副棺木入面，呢副就係美式楠木棺。之但係，當時孔祥熙就覺得呢副棺木太細，唔適合孫中山，咁所以就換咗第二副比較大嘅楠木棺，棺木入面仲有一塊玻璃隔層，可以畀人瞻仰孫中山遺容。

之但係，原來孫中山臨終前係講過，自己過身之後係想好似列寧咁樣保存身體，等後世可以瞻仰，所以治喪處其實就已經向蘇聯訂咗一副水晶棺，並且喺1925年3月30日送到中國，亦都係後來停放咗喺北平碧雲寺中山紀念堂入面，呢副就係第三副棺材。

咁第四副又係點嚟呢？原來第四副就係喺美國訂購嘅紫銅棺，亦都係孫中山先生最後用到嘅一副棺材，喺1929年5月22日，孫中山遺體就被安置入到呢副棺材，後來就送到中山陵安葬。

原圖嚟自網絡