袁世凱為咗順理成章做皇帝，不惜大造文章作一個「龍鱗」嘅故事出嚟，相信史友們都必定聽過呢段自製嘅「神話」，而關於袁世凱其實仲有另一個別名，民間就叫佢做「蛤蟆」，阿史今次就同大家介紹下啦！

袁世凱係民國大總統，同時亦都係洪憲皇帝，但就喺佢稱帝期間，民間就流傳咗一個傳說，指佢係「蛤蟆精轉世」，呢個講法就有幾個起源。相傳喺袁世凱出世之後，佢嘅爸爸袁保中就曾經夢見過一隻大蛤蟆爬到袁世凱身上，而當袁世凱長大之後，頸同腳都比較短、行起路上嚟就係外八字，每逢落雨仲會打開口噓氣，外人睇落就覺得幾似一隻「蛤蟆」，呢個係其中一個講法。

而比較有真實性嘅一個講法就係嚟自佢手下馮國璋。喺民國六年果陣，有一日袁世凱就如常咁午睡，而午睡之後佢都必定會用一隻玉杯飲茶。之但係，負責幫佢加茶嘅下人就因為見到袁世凱床上有一隻大蛤饃而嚇親，唔小心仲打爛咗個玉杯。佢慌忙咁收拾，仲向府上嘅老人家求助，而呢位老人家就教佢同袁世凱解釋。袁世凱起身嘅時候發現隻杯爛咗當場大怒，但呢位下人即時解釋話，係因為見到床上「卧着一條五爪金龍」而嚇親，袁世凱聽到之後心中十分高興，仲拎咗十個大洋獎賞呢位下人。

至於最後一個講法，就係關於「癩蛤蟆難過端午節」，因為民國5年6月5日係農曆端午節，而袁世凱就喺呢一日昏迷不醒，仲喺6月6日斷氣，咁所以穿鑿附會之下就稱佢為「蛤蟆」喇！

原圖嚟自網絡