牙刷係由一位皇帝發明？

牙刷今時今日已經成為大家日常生活嘅必需品，牙刷嘅款式亦都有唔少，之但係史友們又知唔知世上第一枝牙刷係點樣嚟呢？今次就真係講開有段故喇，事關牙刷嘅起源係同一位中國皇帝有關！

喺牙刷未出現之前，世上嘅古人都有唔少方法去清潔自己嘅牙齒，就好似用小蘇打又或者白堊，而中國嘅古人就會用到楊柳枝頭。咁第一枝牙刷到底又係點樣起源呢？根據美國牙醫學會嘅資料，原來第一枝牙刷係由明孝宗朱祐樘發明架！

其實同牙刷相似嘅器具喺南宋之前就已經出現過，但清潔嘅效用就差好遠，相傳明孝宗喺1498年為咗可以改善呢一點，就好前衛咁將又短又堅硬嘅豬鬃插咗入一把骨制嘅手把之上，就係咁樣，世上第一把天然刷毛牙刷誕生。咁點解西方會得知呢把牙刷係由明孝宗發明呢？原來呢款牙刷後來就傳到去歐洲，但由於製作費用太貴，唔係太多人可以負擔得起，但就足以打響名堂。其後歐洲人就根據呢款牙刷慢慢改良，先後用過馬毛同埋羽毛、慢慢發展成大家今時今日用緊嘅牙刷喇！