提起錢幣，阿史以往就同大家介紹過「五帝錢」，亦都有講過墨西哥鷹洋，而鍾意收藏貨幣嘅史友，可能手上都會有返幾個「袁大頭」，咁阿史今日就同大家介紹下呢隻貨幣啦！

「袁大頭」其實唔係呢隻錢幣正式嘅名，只係因為呢種錢幣正面直接就有袁世凱像，而且望落仲相當神似，所以就被民間咁樣稱呼喇！至於錢幣嘅背面，就係鑄有嘉禾圖樣。望到今日嘅題目，相信史友們心中都會有一個問題，就係明明袁世凱只係做咗好短時間嘅總統同埋83日嘅皇帝，但點解又會有「袁大頭」鑄造到出嚟，而且仲成為近代中國流通最廣、數量最大嘅貨幣呢？咁就要由清朝倒台嘅社會情況講起。

喺1912年宣統退位之後，其實當時中國嘅貨幣制度相當混亂，民間流通嘅唔單止有龍銀，仲有佛銀、鷹洋等等，根本就冇一種統一嘅貨幣。當時袁世凱既想解決呢個問題，又想為自己籌集軍費、建立聲，於是就決定喺1914年推出《國幣條例》同埋《國幣條例施行細則》，確立銀本位貨幣制度，新國幣「袁大頭」就係呢個時候開始喺天津、廣東、武昌、南京等地開始鑄造，由含純銀量、幣形、成色都有一定嘅標準，好快就流通全國。

雖然後來袁世凱稱帝失敗，喺民間威信全無，但當時中國已經陷入軍閥混戰，根本冇人可以重新設計到貨幣，「袁大頭」就咁樣繼續流通同埋鑄造。雖然後來國民政府喺1933年嘗試鑄造新貨幣，但最後因為通貨膨脹而失敗，「袁大頭」又重新成為民間主流貨幣。直到1950年代，「袁大頭」仍然喺雲南，西藏等邊陲少數民族之間流通。

原圖嚟自網絡