早幾日就同史友們介紹咗袁世凱被稱為「蛤蟆」嘅幾個故事，咁就有史友睇完呢個講法之後，諗起袁世凱仲曾經扮過真龍天子，就想阿史為大家介紹下呢個故事，咁就當然冇問題啦！

其實古代大部份嘅皇帝都會以各種方法證明自己先至係「真命天子」，而呢項「傳統」就算嚟到清末民初都係一樣。袁世凱本身係李鴻章淮系軍閥集團其中一員，經歷洋務動動，辛亥革命嘅變動，令到佢一舉成為民國大總統，權力達到全國嘅頂峰。而喺掌權之後，因為身邊嘅人同埋自己嘅野心，令佢更加想成為「皇帝」，但咁樣就需要有一個神話吹捧自己，以下就係其中一個版本。

袁世凱當時就諗到一個方法，就係喺自己每次沖完涼之後，都會叫府上嘅下人入去打掃，而每次呢啲下人打掃完之後，都會發現個浴池當中留低幾塊鱗片，甚至呢件事真係令到有人信以為真，一傳十十傳百，令到有部分人以為袁世凱係「真龍天子」。

但呢件事又點會咁簡單，喺袁世凱登基之前，佢本身嘅廚師就五五十十交代晒，原來袁世凱登基前半個月經常會主動沖涼，而沖涼之前就會要求廚師收集大嘅魚鱗，於是沖完涼之後就會有鱗片喇！至於另一個版本情節都係相近，但主角袁世凱就根本唔知情，事關連佢自己都被妻妾放置嘅魚鱗呃到，誤以為自己真係「真龍天子」，真係估唔到係咁！

原圖嚟自網絡