「劉姥姥進大觀園」係咩意思？

早幾日阿史就講到大英博物館入面還巴特農神殿雕塑嘅事，咁就有史友留言分享自己以往遊覽各地博物館嘅經歷，佢就形容自己初時好似「劉姥姥進大觀園」，呢句說話真係講開有段故喇！

有睇《紅樓夢》嘅史友們應該都知道，劉姥姥雖然就唔係故事入面嘅主角，但就係賈府喺鄉下嘅一個姥姥，冇乜見過大世面就咁入咗賈府呢類大戶人家度，仲先後得到王熙鳳、賈母等人嘅歡心，所以劉姥姥嘅呢個角色都有一定嘅重要性。至於「大觀園」就係賈府大花園，書入面就形容呢個地方係「天上人間諸景備，銜山抱水建來精」，真係氣派十足。

言歸正傳，咁「劉姥姥進大觀園」又即係有咩意思呢？原來喺劉姥姥入到賈府，同賈母遊大觀園果陣，就一邊飲酒一邊講笑，相當高興，成個畫面就係就好似入到一個陌生嘅花花世界咁，於是成句嘅歇後語就係「眼花繚亂」。而由於呢個故事仲可以引伸到幾種唔同嘅意思，所以仲有另外幾個唔同版本嘅講法，就好似「劉姥姥進大觀園——洋相百出」、「劉姥姥進大觀園——大開眼界」、「劉姥姥進大觀園——滿載而歸」等，唔知史友們仲有冇聽過其他呢？