流失國寶香港再現？

上次介紹英國大英博物館有唔少嚟自中國嘅文物，好多史友都留言討論，阿史幾時都講，睇史友留言經常學到嘢，真係要多謝各位史友。

講到中國流失嘅國寶，阿史今次就要講講香港嘅嚤囉街喇！呢段位於上環一帶嘅古玩街，就不少會有啲珍貴文物出現，甚至係去到國寶級嘅珍貴程度。其中一個上海博物館館藏嘅一批戰國時代楚國竹簡。响1994年，香港中文大學古文字專家張光裕教授响香港文物市場發現咗有幾批同郭店楚簡類似嘅竹簡，於是就通知上海博物館館長馬承源，結果上博先後獲得1,200幾枚竹簡，呢個就係著名嘅上海博物館藏戰國楚竹書（學界稱為「上博簡」）。

除咗上博簡，呢一個响香港出現後嚟又震驚全國嘅就係「清華簡」。2006年嚤囉街出現另一批戰國竹簡，後嚟有北京清華大學校友購入，再捐咗俾清華大學，被稱為「清華簡」，亦係現存戰國時期嘅重要文物。响2007年嚤囉街又出現一批秦代竹簡，後嚟被湖南嶽麓書院購入，就係「嶽麓書院藏秦簡」，成為咗研究秦國歷史嘅一個重要發現。