孔聖堂中學「孔聖堂」 原來大有來頭！

中式嘅傳統廟宇、圍村嘅書室、私塾阿史以往都同大家講唔少，但史友們唔知又有冇聽過香港都有一座「孔聖堂」用嚟宣講孔孟之道呢？

阿史今次要介紹嘅「孔聖堂」其實就係位於銅鑼灣嘅孔聖堂中學入面，呢座「孔聖堂」係喺1935年建成，係香港早期極少有嘅華人會堂，未有呢座中學之前，「孔聖堂」就已經存在。而講起呢個華人會堂，就真係大有來頭！

「孔聖堂」係由曾富、簡孔昭等名人喺1935年建立，咁主要目的當然係想宣揚孔孟之道，而以往呢個講堂亦都有唔少名人嚟到演講，就好似唐君毅、牟宗三、錢穆、羅香林饒宗頤等新儒家名人嚟到；而新文化運動嘅代表人物茅盾、郭沫若亦都曾經喺度演講過，真係文化味十足。甚至乎喺1940年，悼念魯迅逝世嘅活動都係喺呢度舉行，真係一個相當重要嘅文化界集會場地。