之前介紹過李寧牌嘅故事，咁史友們又知唔知另一位中國運動名將鄧亞萍都有以佢命名嘅運動服裝牌子呢？

鄧亞萍係中國乒乓球界傳奇人物，16歲已經係世界冠軍，仲係4枚奧運金牌得主，呢位乒乓女王多年嚟响內地非常之有名氣。亦因為咁，有公司就通過佢嘅知名度响中國龐大市場當中佔一席位，就係咁以佢個名命名嘅「鄧亞萍牌」就咁樣出現咗。

但其實，呢個「鄧亞萍牌」並唔算屬於鄧亞萍本人，而係佢同一間山東濟南嘅公司簽咗協議書，俾佢以「鄧亞萍」三字申請注冊商標，而公司就會向佢支付有關費用。所以，阿史當年去濟南個陣，的確係見過呢個牌子嘅舖頭，據講當年鄧亞萍牌專門店响濟南開張佢本人親自去剪綵。

不過，持有鄧亞萍牌嘅企業之後無按期俾錢鄧亞萍，而佢哋嘅協議中就講明如果間公司履行唔到協議，鄧亞萍牌嘅注冊商標就歸鄧亞萍所有，結果鄧亞萍為此提出起訴。後嚟呢間公司就以濟南偉民鄧亞萍體育用品有限公司名義繼續運營，不過咁，呢個牌子似乎就只係响山東一帶見得到，亦無李寧咁出名。

原圖：網絡