之前就同史友們介紹過商朝司母戊鼎，唔少史友都覺得呢啲古代文物嘅故事好有意思，想阿史再介紹多啲，咁阿史今次就想介紹下曾侯乙墓編鐘。

曾侯乙編鐘現藏於湖北省博物館，呢套編鐘喺1978年喺湖北省隨縣曾侯乙墓出土之後，經過專家詳細研究，就發現係一套相當珍貴嘅文物，所以直到依家都仲係首批禁止出境展覽文物之一。喺曾侯乙墓開挖嘅時候，其實考古團隊最初係睇唔出有啲咩文物，直到打開槨板等泥水退去之後，先至發現到呢一套迄今數量最多、規模最大、保存最好、音律最全、音域最廣嘅古代編鐘。由於編鐘入面45件甬鐘上都刻有「曾侯乙乍𠱾」嘅銘文，所以就以「曾侯乙編鐘」命名。

如果單純就咁睇數量同保存狀況，好多現狀都係一目了然，但喺冇得敲打嘅情況下，專家們又係點樣得知呢套編鐘嘅音律呢？答案就係複製喇！考古團隊就喺1983年將呢套數量龐大嘅曾侯乙墓編鐘成功複製，最後就嘗試出呢套編鐘音域寬廣，有五個八度音程同埋一大二度，中心音域又有十二半音，下層大鐘聲音低沉渾厚、中層嘅鐘聲音圓潤明亮、至於上層嘅聲音透明純凈，真係好難想像原來古代中國就已經對七聲音階、絕對音高有咗清晰嘅了解。有興趣聽下呢啲古音嘅史友，不坊可以網上搵下曾侯乙墓編鐘嘅影片聽一聽！

原圖嚟自網絡