「身在曹營心在漢」係指邊一位？

喺三國嘅歷史故事入面，都流傳住一句好出名嘅成語「身在曹營心在漢」，而呢句說話今時今日就係用嚟形容一個人身在一方但內心就係掛住自己原先所在之處，而呢句說話嘅起源，其實同一個人有莫大嘅關係。

阿史所講嘅正正就係桃園結義三兄弟入面嘅「關二哥」關羽。喺東漢末年其實時局相當混亂，劉備雖然係皇室後代，但去到好後嘅時間先至得到徐州呢個地方，喺立足未穩、兵力未足嘅情況下，好快就畀曹操大軍打敗。當時劉備單騎走去投奔袁紹、關羽據守下邳保護劉備兩位夫人。

由於曹操一直賞識關羽才能，好想將佢收納為已用，所以得知呢個消息後，曹操好快就攻陷下邳，逼關羽投降。而喺投降之前，關羽就同曹操做咗個約定，表明自己只係降漢不降曹。曹操就一方賜佢金銀珠寶、「漢壽亭侯」官印，但呢啲關羽都不為所動，直至曹操送咗赤兔千里馬，關羽先至感激萬分。