【講開有段故】「三個臭皮匠」點樣勝過一個諸葛亮？

繼續同史友們介紹一啲三國嘅經典典故，上次就同大家介紹咗「劉備摔孩子」嘅故事，今次就同大家講一講一句經常都會聽到嘅說話，就係「三個臭皮匠，勝過一個諸葛亮」。明明諸葛亮就被描繪到絕世聰明，但又點解會畀三個臭皮匠勝過呢？

所以嘅「臭皮匠」其實就係解做平民百姓、凡夫俗子，而諸葛亮就係三國時期蜀漢宰相，兩者之間差天共地，而呢句說話嘅故事就要喺赤壁之戰果陣講起。當時劉備聯同孫權合力喺赤壁之戰打敗曹操，而當時「火燒連環船」之前最關鍵嘅一招就係「草船借箭」，顛覆咗成個戰局。

咁大家都知「草船借箭」係由諸葛亮諗出嚟，而喺當時其實諸葛亮就帶過三個手下去到江邊視察環境，仲將啲小船嘗試裝上草靶、布幔。但點知，當時三個隨從就即時指出咁做會有破綻，後來就將草靶子改成稻草人、套上皮衣、皮帽令到成個畫面睇落似真人。而諸葛亮睇完之後，就表示「真是智者千慮，必有一失；一人難敵三人之智！」自此之後，後人就將呢個情況形容為「三個臭皮匠，勝過一個諸葛亮」。

原圖嚟自網絡