北大紅樓係五四運動發源地？

今日係五月四日，當然要講講102年前發生嘅五四運動。五四運動嘅經過阿史呢幾年每年都會講，今次就想講講北大紅樓。

相信史友們都好清楚，北京大學係五四運動一個重要嘅關聯地，因為當年北大學生們知道巴黎和會中中國被日本搶咗德國原本响山東搶佔咗嘅利益。作為一戰戰勝國的中國竟再一次喪權辱國，激起北京大學生怒火上街遊行示威，其中北大學生就係當中嘅中堅份子。當時嘅北大校園，就係响紫禁城東北面幾個街口嘅位置，所以當時嘅北大學生就可以好快啲咁行去天安門遊行示威。

北大紅樓於1918年落成，係北京大學校部、圖書館、文科院所在地，當年陳獨秀、李大釗、魯迅、胡適、錢玄同等人先後响呢個地方任教任職，亦成為新文化運動一個關鍵場所。所以，無論係廣義上嘅五四運動（新文化運動前後嘅思潮），抑或狹義上嘅五四運動（因巴黎和會引發嘅遊行示威），都同呢幢紅樓有直接關係。