近年內地、香港、台灣等地都興起咗漢服熱潮，唔少年輕人都視漢服為時裝，特別係响大學校園裡面不時有學生著漢服影寫真。不過，有唔少人都對漢服呢樣嘢有啲誤解。

阿史响網上見到一個對漢服嘅解釋，就係話係漢代嘅服飾。其實依家大家提及嘅漢服，泛指漢族嘅傳統服飾。如果史友們留意一下，就會發現响網上見嘅漢服，款式同用色都唔太一致，因為啲漢服可能係漢代嘅款式，又可能係魏晉時期款式，又可能唐宋明等朝代嘅款式。

其實古代中國嘅服飾，對亞洲呢個中華文化圈有好大影響，好多國家傳統服飾都係由漢服演化過嚟。好似日本嘅和服，最初起源係由三國時期東吳傳入嘅服飾演化過嚟，所以日本就有吳服呢個稱呼。記得讀書個陣有一堂學中外文化交流史時，睇咗一套叫《燕行錄》嘅見聞錄，其中一名朝鮮使臣响清代入使中國時，就同人講自己著正宗漢服，但啲人就暗笑佢仲著緊明代嘅漢服，笑佢係因為清代只有戲子先會咁著。

原圖：網絡