早排阿史都同大家介紹咗一系列嘅三國典故，就好似「徐庶進軍營」、「士別三日、刮目相看」等等，而今次阿史就想講一講一句大家成日都會講而且又係同一位三國英雄有關嘅說話，呢句就係「過五關斬六將」喇！

今時今日提起呢句說話，大家都會理解成克服重重難關最後得以成功，而唔講唔知，呢句說話其實係嚟自《三國演義》入面嘅故事。故事就發生喺關羽辭別曹操之後，佢就負責護送甘、麋兩位夫人搵返劉備，但由於路途上係要先經過五個關隘，而當時關羽又冇得到曹操放行文書，所以為咗令到兩位夫人可以順利到去劉備身邊，關羽喺通過東嶺關、洛陽、汜水關、滎陽同埋黃河渡口果陣都分別斬殺咗孔秀、孟坦、韓福、卞喜、王植同埋秦琪合共六將。雖然呢啲將領都係未有史料記載嘅人物，但由於呢個場景太過深入民心，後世就用嚟形容克服重重困難，就有咗「過五關斬六將」呢個講法喇！

原圖嚟自網絡