早幾日阿史就同大家介紹完一位世上最年輕嘅年齡拎到世界冠軍嘅伏明霞，而就史友留言話，其實除咗伏明霞仲有一位都係世界冠軍級人馬，咁到底呢位人物係邊個呢？阿史今次就同大家介紹下啦！

呢位史友所講嘅其實就係中國前跳水運動員熊倪喇！熊倪早喺1982年就已經進入到湖南省隊，1986年就入到國家集訓隊，期間唔單止喺全國嘅比賽當中拎到1公尺彈板、3公尺彈板、5米台同埋全能共四項冠軍，就算係去到外國嘅國際邀請賽當中，佢都拎到高臺跳水冠軍，真係前途無可限量。

而熊倪真係踏足奧運會就係喺1988年嘅漢城奧運，相信有睇過呢場比賽嘅史友都知道有幾刺激。當時只有14歲嘅熊倪喺呢場比賽當中挑戰佢兒時嘅偶像，有「跳水皇帝」之稱嘅洛加尼斯。喺頭九輪嘅比賽當中，熊倪係領先洛加尼斯3分，兩者就要喺第十輪一決勝負。而去到第十輪嘅時候，其實兩者嘅表現都係相當出色，之但係當時比賽嘅結果就係熊倪最終以1.14分之差屈居亞軍，就係咁樣失落咗奧運會嘅金牌喇！

原圖嚟自網絡