呢排都同史友們介紹咗唔少中國嘅航天軍事科技點樣喺艱難嘅時代背景走過嚟，並且得到今時今日咁好嘅發展。而講完呢啲喺空中嘅科技，當然就要同大家講啲「貼地」嘅，今次就介紹下「東風」牌國產小轎車啦！

「東風」牌國產小轎車，顧名思義就即係我國第一架自行研發嘅車輛，呢架車嘅出現亦都揭開我國民族轎車工業嘅新章。要知道經歷過長年嘅戰亂，喺建國初年中國各方面都相當落後，更加唔洗諗住會有自行製造車輛嘅能力。咁到底又點解冇啦啦會有呢個諗法呢？

原來喺1949年12月果陣，當時毛澤東出訪蘇聯，期間就見到當地嘅汽車製造廠點樣生產汽車，而喺佢返到中國之後就主動提出中國都要自主研發汽車，於是一汽建設就被列入新中國第一個五年計劃入面嘅「156項工程」之一。

而喺呢次計劃喺1953年動工，經過三年時間正式製造咗第一架汽車「解放」牌CA10，而呢架車上車頭標誌設計係一條金龍、車身就鑲嵌毛澤東書寫嘅「中國第一汽車製造廠」字樣，而車身後大燈就係設計自中國古代宮廷用到嘅紅紗燈，真係充滿中華民族嘅特色。

原圖嚟自網絡