早幾日阿史就同大家介紹咗兩位傳奇嘅中國運動員伏明霞同埋熊倪，而阿史都想同大家繼續講下呢啲傳奇人物，今次就介紹下乒乓波界嘅代表人物之一，就係以「直拍橫打」聞名嘅劉國梁喇！

出生喺河南嘅劉國梁，其實佢爸爸本身就係體育教練，而佢就喺6歲就開始學打乒乓波，以10歲之齡去到北京比賽，好快就以高超嘅技術聞名。劉國梁喺1989年先至入選國家青年隊，1991年就以15歲之齡破格入選國家隊，自此之後就鋒芒嶄露。

喺入到國家隊之後，劉國梁就先喺1994年同隊友一齊拎到世界杯男團冠軍，其後1996年亞特蘭大奧運、1996年世界杯、1999年世錦賽當中，劉國梁就應用「直拍橫打」技術，拎到單打冠軍，係當時中國第一位拎到乒壇「大滿貫」嘅男運動員，甚至果幾年仲世界乒壇仲被稱為「劉國梁時代」，認真巴閉！

之不過，後來國際乒聯通過改革方案，乒乓球由38毫米改成40毫米、「無遮擋發球」嘅政策亦都推行，劉國梁唔少招牌嘅招式都無法繼續。喺咁嘅情況之下，呢位傳奇球員就以26歲之齡決定結束球員生涯，但佢並冇放棄到乒乓波，而係轉做有史以來中國隊最年輕嘅國家乒乓球男隊主教練！

原圖嚟自網絡