山頂唔係華人禁區？

早幾日响網上見到一張以前香港嘅黑白相，個內容感覺幾特別所以就想史友們分享一下。

呢張相有乜咁特別呢？就係一個華人响昔日嘅山頂拍嘅，圖說就話係「二十世紀初」嘅黑白照。相信史友們都知道，响二戰前好一段時間，山頂係外國人專屬住宅。响1904年同1918年，立法局先後通過《山頂區保留條例》同《山頂居住條例》，居住太平山被正式列為上流社會以及外國使節嘅專有權利，唔俾華人住。所以，一個清末民初時期打扮嘅華人以二戰前山頂一群西式建築群作背景，特別之餘落差對比相當大。

雖然當年政府唔俾華人响山頂一帶居住，不過，當時其實有華人响山頂一帶活動。據了解，當時唔少外國人家庭都有華人工人。另外，就係華人轎夫就山頂居民提供服務，即使纜車通車後，仍有唔少外國人以坐轎作為上落山嘅交通工具。所以，以往山頂地區雖然唔俾華人居住，但嚴格而言唔算係華人嘅禁區。