呢幾日就同史友們講到以色列巴勒斯坦衝突嘅前身今生，而令到呢個局勢一直持續就要由第一次以阿戰爭講起。其實喺一戰之後，原先中東統治者奧斯曼土耳其帝國同德國嘅結盟戰敗，巴勒斯坦地區就由戰勝國之一嘅英國控制。

當時呢片土地上就住咗多數嘅阿拉伯人同埋少數嘅猶太人，而英國就賦予咗猶太人建立「民族家園」嘅任務，令到兩者嘅衝突升溫，暴力事件亦都不斷發生。喺二戰之後，抵達巴勒斯坦嘅猶太人不斷增加，去到1948年仲成立以色列國，隨即就爆發第一次嘅以阿戰爭。

喺戰爭初期，其實由黎巴嫩部隊、敍利亞部隊、伊拉克部隊、埃及部隊、外約旦部隊等國家組成嘅阿拉伯聯軍最初係佔有優勢，令到以色列軍隊節節敗退。之但係去到1948年5月17日，美國就插手事件向聯合國安理會遞交一份議案，結果令到雙方同意停火四週，當時阿拉伯聯軍已經佔領了巴勒斯坦過半領土。

而喺停火嘅呢幾個星期入面，以色列就大力擴充軍備，向美國、英國進口轟炸機，從法國引進坦克，又喺捷克得到大批武器；至於世界各地嘅猶太人有錢亦都出錢、有力嘅亦都去參軍。時間去到7月9日，阿拉伯聯軍再開攻擊，以色列軍隊成功反擊打敗呢支以埃及軍隊為主力嘅聯軍，佔領巴勒斯坦總面積80%土地， 96萬巴勒斯坦人淪為新難民。

原圖嚟自網絡