峨眉山古廟「佛牙」 竟然係20萬年前古生物？

佛門一向都流傳有唔少聖物，而呢啲聖物甚至成為後世信徒朝拜供奉嘅物品，之但係到底呢啲聖物係點樣嚟，原本又係啲咩嚟呢？早前峨眉山一座古廟就親身解答咗呢個問題。

作為四大佛教聖地之一嘅峨眉山，山上有一座歷史悠久嘅萬年寺，據講呢座寺廟最早係建於東晉隆安五年(西元401年)，係峨眉現存最大且歷史最悠久古廟。寺內相傳就有一顆上古「佛牙」，據講就係明朝由一位高僧喺斯里蘭卡拿帶返中國，係釋迦牟尼火化後嘅「舍利佛牙」。「佛牙」表面睇落就係呈金黃色，隱約仲有紫色條紋，而重量亦都達到6.5公斤，真係誇張！

而因為呢個傳說，多年嚟都引嚟唔少人嘅好奇心，大家都猜疑到底呢顆「佛牙」係啲咩。而早前古生物學家就對此進行分析，竟然發現原來「佛牙」真身就係20萬年前嘅劍齒象牙齒化石。雖然就唔係「舍利佛牙」，但呢種化石喺古代都已經好罕有，呢顆「佛牙」照樣都係「峨眉鎮山之寶」啊！