盧作孚點解被稱為 「不能忘記」實業家？

早前就同史友介紹到近排張大千嘅一幅隱世八十年嘅對聯作品，呢幅作品除咗係張大千最大嘅對聯作品之外，其實仲同民生公司嘅一段救國史有關，阿史今次就同大家介紹下啦！

張大千嘅呢幅作品其實就係佢喺80年前為「民生公司內江辦事處」而作，咁點解呢位當代傳奇嘅藝術家會為呢間公司作對聯呢？「民生公司」係由盧作孚喺1925年喺嘉陵江上游合川募資而成，當時就以八千大洋訂購咗一艘七十噸重小火輪，並以「民生」命名。雖然途中就經營得唔太順利，但去到1935年都收購到二十間中外輪船公司，統一長江上游。

航運業得以化零為整，之不過冇幾耐抗戰就爆發。當時盧作孚就諗，「國家對外的戰爭開始了，民生公司的任務也就開始了，民生公司應該首先動員起來參加戰爭。」於是呢間由一代船王盧作孚創辦嘅民生公司，喺抗戰時期就用到輪船將軍隊、政府人員、學校師生及各項工業物資等搶運撤往川、渝，而盧作孚更是親自奔赴宜昌，坐鎮指揮，不計得失，呢場行動亦都被稱為中國實業史上鄧寇克大行動，成功保住咗民族工業命脈。