提起近年嚟出色嘅舞蹈節目，相信史友們應該都會記得阿史之前介紹過、由河南衛視製作嘅《唐宮夜宴》，亦都因為呢個節目帶動埋內地民眾去參觀博物館。適逢端午節，河南衛視又有新搞作，呢次就推出咗《端午奇妙游》嘅節目，單單係一個開場舞《祈》，就驚艷全國民眾，到底呢個畫面有幾靚？阿史今次就同大家介紹下啦！

據河南衛視介紹，《端午奇妙游》實際上就係早前《唐宮夜宴》嘅前傳，而《祈》呢個開場舞就係取材自《洛神賦》入面「翩若驚鴻，婉若游龍」嘅舞姿。就咁聽好似好抽象，但今次河南衛視就將呢種舞具現化咗。其實屈原喺自己嘅詩詞入面都有提過洛神，而《祈》呢一部分正正就係同節日主題相互配合，以水下舞蹈形式呈現出1600年前水下飛天嘅舞姿。

喺水下跳舞又係點樣做到呢？據導演介紹，原來舞者要喺水入50秒換一次氣，仲要連貫咁保持住舞姿優美流暢，單單係呢一部分就已經經歷3次拍攝，浸足26個鐘先至拍到出嚟，有興趣嘅史友真係要去睇一睇支持下啊！

原圖嚟自網絡