近年嚟香港嘅民間興起一股古蹟熱潮，唔少民間團隊都自發去翻查香港嘅歷史，甚至仲有部分人會去實地考察，睇下可唔可以搵得返一啲歷史古蹟。近排香港就有個民間考古團體喺翻查英國國家檔案館資料果陣，喺山頂位置發現到一個擁有124年歷史嘅海軍準將別墅遺址，連同奠基石以及海軍界石等百年舊物。

據了解，今次發現嘅舊址曾經就有過四座建築物，包括官療養院（Officers’ Sanatorium）、男士療養院（Men’s Sanatorium）、轎夫宿舍（Chair Coolies Quarters）同埋海軍準將別墅（Commodore’s Bungalow）。前三座嘅建築物都喺1970年清拆重建，就只係得返海軍準將別墅遺址仲殘留落嚟。而呢個海軍準將別墅其實原本就係1878年6月24日開始租用，去到1953年6月21日租用期屆滿。

呢個民間考古團體「香港行跡」就根據海軍地界圖喺原先七粒海軍界石中，搵到其中嘅三塊，上面都係刻有英文字AL；除此之外團體仲喺遺址度搵到COMMODORE’S BUNGALOW奠基石以及相信係室內嘅彩色地磚。之不過，以目前嘅評級機制，古蹟辦就表示唔適用作評級，到底呢個遺址會點處理，就真係要拭目以待喇！

原圖嚟自網絡