提起西班牙馬德里王宮（Palacio Real de Madrid），相信唔少史友們都可能聽過，甚至仲可能去過參觀。而喺呢個王宮入面嘅主畫廊，自2020年開始就展出咗描繪《使徒行傳》場景嘅九幅拉斐爾掛毯，而且仲要係西班牙國王訂製嘅版本，之但係另幅掛毯近日就面臨一種另類嘅危機！

喺1515年，當時羅馬教宗利奧十世（Pope Leo X）委託後來被稱為「文藝復興三傑」嘅拉斐爾設計掛毯，主題就係要以描繪基督教教堂之父——聖彼得同埋聖保羅故事為主，於是拉斐爾就喺1515年至1519年間設計出一系列作品補足禮拜堂講述福音從耶路撒冷傳至羅馬嘅完整圖像故事，其中十幅就係以《使徒行傳》為主題。

咁到底呢次掛毯到底係面對咩危機呢？原來近日王宮嘅工作人員為咗令到畫廊可以通風而打開窗戶，結果就有大批鴿子闖入，甚至仲停留喺掛毯附近，場地上都已經出現鴿子糞便，令到唔少市民都擔心文物會唔會受損。而負責呢次展覽嘅西班牙國家遺產（Patrimonio Nacional）事後連忙發出聲明安撫民眾，仲補飛裝上驅趕鳥類用嘅超音波裝置，暫時嚟講掛毯都仲係安全嘅。

原圖嚟自網絡