記得多年前央視播過一套《皇后大道中18號》，內容就係講中國共產黨黨員响1937年抗日戰爭全面爆發後响香港建立聯絡處，負責支援抗日工作。咁又關皇后大道中18號乜嘢事呢？

當年皇后大道中18號，就係呢個聯絡處所在地。話說响1937年，當時响延安嘅毛澤東要求廖承志到香港開設香港八路軍、新四軍辦事處。於是廖承志經武漢、廣東，1938年初到達香港，响香港同一批响香港做地下工作嘅共產黨人包括潘漢年、吳有恆、連貫等人秘密商議，結果佢哋就响皇后大道中18號開咗間茶莊，叫粵華公司，專做茶葉批發零售生意，但實際上暗地裡做嘅工作係籌集海外僑胞所捐嘅資金同物資、搜集情報、做抗日宣傳等。而佢地為咗分散風險，佢哋就以港澳醫生柯麟同佢胞弟柯正平開辦嘅南華藥房作為另外嘅聯絡點。

但後嚟香港淪陷，八路軍香港辦事處响1942年撤銷，抗日地下工作主要由東江縱隊負責。

原圖：weshare