第五批國家級非物質文化遺產 原來香港有兩個項目成功申報？

早幾日阿史就同大家介紹到第五批國家級非物質文化遺產當中就有幾款特色食品柳州螺螄粉、桂林米粉同埋梧州龜苓膏入選，但唔知史友們有冇留意到，其實呢份名錄當中，又有兩個香港項目成功申報到呢？

阿史所講嘅之唔係香港天后誕同埋香港中式長衫製作技藝囉！呢兩項傳統節日同埋技藝都相當具有代表性，天后信仰喺香港有住相當悠久嘅歷史，相傳喺南宋時期西貢佛堂門就已經有天后廟，即便嚟到今時今日每年農曆三月二十三日天后誕或者其他日子，大大小小嘅社區都仲會有賀誕活動、神功戲、抽花炮等。

至於中式長衫嘅歷史就更加源遠流長，喺民國時期就開始流傳，二戰過後大批上海裁縫師傅來港，直接令到呢個行業得以發展，並且融合埋西式裁剪方法，形成一種香港獨特嘅長衫製作技藝。有咗呢次國家級非物質文化遺產名錄嘅肯定，相信呢兩項非遺都可以得到更好嘅發展同延續。