尋日阿史就同大家介紹到首都北京就有一座標誌性嘅建築物開幕，呢座建築物正正就係黨史展覽館，而近日喺瀋陽亦都有一個同黨史有關嘅展覽。

阿史所講嘅呢個展覽就係由紅色文物收藏家詹洪閣近日喺瀋陽舉行嘅展覽，當中就展出咗過千件黨史文獻、文物史料，唔少仲係第一次展出，見證住中國共產黨百年歷程。詹洪閣呢次嘅展覽名為「中國共產黨百年歷史文獻展」，當中展品係喺佢過萬件收藏當中精選出嚟，其中一個亮點就係《嚮導》周刊。呢份周刊其實就係中國共產黨中央創辦第一份正式機關刊物，喺1922年9月13日上海創刊。雖然今次展出嘅刊物已經發黃，但就仍然保存完整，仲可以見到係1925年12月3日出版同埋「香港 萃文書坊」字樣，真係相當難得。

唔單止呢件文物，《共產黨》月刊創刊號亦都係呢次展覽中最令觀眾振奮嘅展品，呢份展品據詹洪閣描述就係「這份由上海共產主義小組創辦的刊物，在1920年創刊，這也是以共產黨命名的最早的中國共產黨的刊物」，當中仲有陳獨秀撰寫《短言》「一切生產工具都歸勞動者所有，一切權都歸勞動者執掌，這是我們的信條」，認真有意思！

原圖嚟自網絡