早排喺加拿大卑詩省一個寄宿學校舊址就發現到215具無名嘅原住民兒童遺骸，當時呢個消息就已經震驚全球，實在冇諗到事發一個月之後今次加拿大薩斯喀徹溫省原住民部落「考維賽斯第一民族」就喺瑪麗瓦爾印第安寄宿學校舊址搵到715個冇標記嘅墳墓，相關人士就估計今次係加拿加發現數量最多嘅一次同類型類墓。

位於薩斯喀徹溫省首府里賈納以東140公里嘅瑪麗瓦爾印第安寄宿學校喺1899年建立，一直營運到1997年先關閉。呢個由當地天主教會管理嘅場所，去到1970年代先由當地原住民部落接受管理墓地嘅部份，而日前呢個考維賽斯第一民族就展開探測，希望搵一搵地底到底有冇墳墓，結果就通過地底雷達探測到多達七百個無標記墓地。

可能有史友會問，點解呢啲事經常都發生喺寄宿學校呢？原來印第安寄宿學校制度係由加拿大政府根據《印第安人法》建立並提供資助，並且都係由教會負責管理，當時設立呢啲學校最大嘅目的就係強迫同化原住民，所以就要將佢哋嘅小朋友強制帶到寄宿學校，務求可以令到佢哋形成文化徹底割裂。之不過，呢啲學校內部就經常都發生虐待、強姦、謀殺等事件，結果就直頭演變成種族滅絕，據估計1890年代到1990年代間，至少有多達6,000名兒童遇害，真係滅絕人性。

原圖嚟自網絡