提起17世紀荷蘭黃金時代畫家林布蘭嘅名畫，相信唔少史友都會即時諗起《夜巡》，呢幅畫作現時係荷蘭阿姆斯特丹博物館館藏，一直都被視為係荷蘭肖像畫黃金時代嘅傑作。之但係，其實呢幅畫最初係有34個角色，但後來因為畫嘅表面受到侵蝕、再加上畫作太大難以展出，最終將畫作兩側、頂部及底部切走。多年嚟都有唔少人想了解成幅畫作嘅原貌，而近日就傳嚟一個好消息喇！

《夜巡》呢幅畫作其實係林布蘭受阿姆斯特丹民兵火槍隊委託創作，同佢以往將肖像畫中人物按照尊卑次序排列唔同，呢次佢以全新舞台化效果詮釋隊長Frans Banninck Cocq 與中尉 Willem van Ruytenburch率領全隊於日頭準備出動嘅場景，因為光線昏暗所以令人以為係描繪緊夜間。

呢幅創作喺1642年嘅名畫喺林布蘭去世後遭到嚴重毀壞，而近排荷蘭國家博物館就宣佈成功以AI技術館重新繪製原本被裁走嘅部分，令到呢幅畫喺三百年之後以完整面貌亮相。呢次荷蘭國家博物館就以林布蘭同時代畫家 Gerrit Lundens 所繪製《夜巡》摹本為基礎，以AI技術做咗三種演算法修復《夜巡》，亦即係透視變形、配色組合辨認同埋模仿筆觸。

呢次嘅成功相信係運用最新AI技術重建藝術品嘅一項重要里程碑，阿史真係幾期待有更多嘅藝術品可以得以修復。

原圖嚟自網絡